ماذا قال لي الشاعر

بسم الله الرحمن الرحيم
السلام عليكم ورحمه الله وبركاته
حبيت ننقلكم حوار بيني وبين شاعر من اجدابيا لما حاولت اني انجاريه في الاشعار
طبعا بعض الكلمات كانت من تأليفنا الشخصي وبعضها اجتهاد جبناه من الاشعار المتعارف عليها
اهم شي نبدى الحوار


قال الشاعر :
فيه اوحود غلاهم ودك يبقى كيف حديد ايحدك

رديت :
فيه عرب نباهم طيب لا تباعد لا اتسيب

قال الشاعر :
فيه عرب ودك تدناهم لا تباعد لا تخطاهم

رديت :
فيه عرب ودك تحبسهم في قلبك ماعاد تطلقهم

قال الشاعر :
فيه عرب جوني من شرقه نين الخافق سرقوه سرقه

رديت :
فيه عرب زينه ملقاهم ودك غير الصوب امعاهم

قال الشاعر :
فيه عرب في الاصل ازويه عقلي داروا فيه بليه

رديت :
في عرب ودك تطريهم ما يهدى البال الا بيهم

قال الشاعر :
تطريهم في كل اقوالك فيه عرب حازوه خيالك

رديت :
فيه عرب اتخش الخاطر نعطيها الاقدار قناطر

قال الشاعر :
بالاطنان غلا نعطيهم هلي قولي دوم عليهم

رديت :
يلي كلامك طيب قلبك اصيل وزين ما تسيب

وسكتت وقلت رفعت معاك الرايا وعلنت استسلامي بما اني ما نقدر انجاريه في الشعر وطبعا هذا كان تدريب بس ليا عالشعر معاه طبعا هو شاعر وانا ما نعرف في الشعر حاجه
فختم كلامه وقال :
يابو غثيث ثنايا يابو ميامي ذابلات سهايا يامن رفعت مع كلامي الرايا وقلت سادني منك الحمل ثقيل
يالي كلامك طيب وحق العلي والله ما تسيب حال غايتي نقعد احذاك قريب وننسى همومي كلهن والليل
يا بو لسان خذني من دون العرب تما امعاك ايعادني خذيتا الخاطر يا حدود لاماني يا بو خجل مايح طويل طويل

وانتهت الجلسه الشعريه بيني وبين هالشاعر الشعبي بس بجديات جو حلو الرد بالشعر طلع حتى انا يصير مني في الشعر هههه